فضيت مافي خاطري يابن مذهان = يوم أنت جددت الصلات القديمه 


افرحت صدري باتصالك مسيان = وفرحت فرحة من كسب له غنيمه


أنا أعرف أنك فيك للمعرفه شان = وأن المواصل له مقام وقيمه 


وأقول مشكور على كل ماكان = لو أن هذه يابن عمي يتيمه


البعد وان قالوا مع البعد نسيان = لو مانسى ياخذ مع العزم شيمه


والله ماينسا مع البعد ولهان = منشأ صباه وملعبه مع نديمه


البعد ماينسيه طول الازمان = يحن حن المخلجة عن فطيمه


أن جاء ولا راح بالنفس وجدان = محبته بعروق قلبي مقيمه 


والله عنده مايقدر بالأثمان = قرطوع ماه وزين شمة نسيمه


يصبر ولابيدي خوافيه لأنسان = والصبر مفتاح الفرج والعزيمه 


هذه تصاريف الزمن بين الأقران = من بينهم تقطع حبال الشكيمه


اذكرك كنا اخيين وخدان = يوم الصبا يلفنا مع بريمه 


نسرح ونمرح لاهموم ولا أشجان = بين العيون الساهرات الرحيمه


ادعو معي ياللي تحبون الأحسان = أمين دعوات القلوب السليمه 


الله يجازيهم بعفوا وغفران = يجعل سكنهم بالجنان النعيمه