ياطارشي من دار عرعر وابا القور = يمتها لنجد الغذيه تزوره 


ياطارشي بلغ سلامي على سرور = أنا شفاي ورغبتي في مروره


بلغ تحياتي لخالي ومشكور = وسرور يعرف وارده من صدوره 


ياسرور ماكثر التحاسيف ياسرور = تبي ترجع مامضى من عصوره 


لكنها لحظات تفكير وشعور =  ياسرور مكتوبة للأيام دوره 


لولاي أفضي خاطري واشوف القور = لعل يهدى خاطر فيه ثوره 


أحس شيئ مايبي طب دكتور = لهيب نار بالضلوع محشوره 


العين تذرف دمعها تقل ممطور = ولا الغروب اللي تردت سيوره 


ومن سألني قلتله هزم وبثور =  تذرف ليا حست عيوني ذروره 


من شان مايفطن وأنا أكون معذور = أكتم بنفسي والعيون معذوره 


ياسرور من شيء على القلب ماسور = وسر الشداد اللي بقد وسوره


لا شك اداري هرجة الكذب والزور = يفرح بها اللي قاصرات شبوره


كل الشعور الصادقة يجعلة عور = طبع بنفسه والنميمة سروره


ياسرور هرجة مبغض يجحد النور = يضفي على الغافل طوارف شروره 


ياسرور هرجة مبغض يجحد النور = يضفي على الغافل طوارف شروره


ياسرور في عرض العرب تقل مسعور = مابه مخافه يقطع الله دبوره 


لابوح في سدي وأنا فيه معذور = ولو أن في كشف السراير خطوره 


ما أخشى من العاقل فهيم ومخبور = أخاف من هذر اللئيم الهذوره 


ياسرور من شفت المداهيل والدور = وشفت الدروب اللي كثير نزوره 


وشفت الهضاب الي شرق فوقها نور = وشفت الشعيب اللي تخالف زهوره 


وشفت المكان اللي نزوله تقل قور = سود الرباع اللي كبار كسوره 


وشفت القطين أشكال طور ورا طور = وشفت الضعون اللي بعيد نشوره 


شفته خلا مابه من الحي ماثور = قفر به الارضه تبني جحوره 


من سكنها الاول صحاصيح وقفور = كنه من السكن القديم مهجوره 


أسال ولا انباني عن الحي مذكور = ولقيت من يسأل سؤالي بدوره 


كل سلك درب مسانيد وحدور = وتفرقوا من غير راي ومشوره 


ودي بهم لو هي تجي لي على الشور = لكن هيمات الخيال مغروره 


حكم الزمان اللي على الخلق مأمور = الله أكبر يالسنين الغيوره 


الله وأكبر كل يوم لها دور = تفني وهي بالحالتين معموره 


ياسرور أنا سري عن الناس مستور = قفلت بيبانه وعليت سوره 


عن أقرب الأقراب كني ورا سور = لاشك حدتني عليه الضروره 


حب الوطن ياسرور بين ومشهور = لو هو بعيد عاش بالنفس صوره 


قلبي بنجد معلق تقل مسمور = يكفخ مثل كفخ القضيب لنقوره 


ياعاذلي في حبها ما اسمع الشور = قبلك علوم العاذلين مخبوره


أحبها حب به الدم مفطور = حب طبيعي عميقا جذوره 


به اللحم والدم والعظم مجبور = وأحس أني قطعة من صخوره 


ياما تدرجنا صغيرين وبزور = باطرافها يبهل علينا دروره


ياما سكناها لو الحال ميسور = وياما شربنا من ثمايل مقوره 


مشيت بالرمضا سعيد ومسرور= والقايله يلفح علينا هجوره 


أعيش كني في بساتين وقصور = في وسط جنات تدفق نهوره 


عسى مباكير الحيا فيه منثور = تسقيه زخات المزون الدروره 


ديم تقفا ديم والغيم مزبور = وقت العشا يسقيه وعند البكوره