سمعت قولٍ سحرٍ للالباب = من شاعرٍ بالقيل مبدع ومتبوع 


شاعر مع الشعار يحسب له احساب = مثايله تمتاز في كل موضوع 


هيضت ياعماش من كان منصاب = الي على ماضيه محزن ومفجوع


بيت الشعر لو زال طاريه ماغاب = لو انعدم طاريه ماهو بمقطوع 


موروث والموروث محفوظ بكتاب = وثق لنا التاريخ عربان وانجوع 


يوم البيوت مشرعه مالها ابواب = وحس النجور بطارف النزل مسموع 


في خايعٍ ممطور من وبل سكاب = عشبه جديد وصار نبته على اقشوع


يا ماحلا جمع القرايب والأصحاب = في مجلسٍ مايدهله كل منزوع 


راعيه وقت العسر للنار شباب = ينصاه من يشكي عنا الوقت والجوع 


يوم الرجل يشكر ويذكر اليا طاب = ياصار بين الناس نافع ومنفوع 


لخصت بالقيفان ماضي للاعراب = وماراح وروحته مابها ارجوع 


تغير الأدوار والوقت دولاب = واتفرق الأيام ماكان مجموع