شيء يحز بخاطري يوم جاني   = من الذكريات المنغصات الغرابيل 


الذكريات الي صدها لحـــاني  =  ايقض بنفس مرمســـات مســـامــيل 


تلحــني لح الرشــا للسوانــي =  لح المحوص المقط فوق المحاحـــيل 


جيت الديار الي سكنها زماني =  من شان ذكراها تعنيت يامهيل 


ادوج فيها من مكان لمكاني = منازل المقطان ولا المراحيل 


مرتع صباي وصحبتي مع اقراني = حلم ذهب ولا عاد للحلم تاويل 


ماكنها الا لحظة من ثواني = وميض برق لاح في ظلمة الليل 


بس اتجمل بالمنى والتماني = هل يرجع اللي فات لو طول الطيل


من المستحيل اللي ذهب يجي ثاني = مافات مات ولايجي مثل ماقيل


الله يصرف حادثات الزماني = له البقاء ويبدل الأمر تبديل 


له الدوام ومجمل الخلق فاني =  أفنا ثمود وعاد وافنا هل الفيل 


معبود مايعبد معه رب ثاني = يحي موات الأرض بالوابل والسيل 


ويضفي على الماضين لطف وحناني = ويفتح لهم باب الجنان المضاليل 


ويضفي على الباقين بأمن وأماني = ونعيم عيش فيه زودا وتكميل


وين البيوت اللي زهت بالمباني = ودق النجور وسوق شقر الفناجيل 


بيوتا بنوها للكرم والعواني = وترحيبة باهل الركاب المقابيل 


بيتا خلافه بيت وحذاه ثاني = مثل الهضاب المهدفات المضاليل 


برباعها تلقى جميع المعاني = دلال قريشيات ومفطح الحيل 


مشروبهم بالكيف بنا يماني = برية تغدى عماس الرجيل 


ذكرت أبو صالح عريب المجاني = طيب وله في ذروة الطيب تأهيل 


عز القصير وريف من جاه عاني = من صفوة البرزان جيل بأثر جيل 


فيه المروه والكرم والحساني = وشريف عن طرق الدنس والأباطيل 


وأن جاه مطفوق براسه نواني = حطه على يمناك يوفي له الكيل 


يشد بيدينه قيودا متاني = عقب السطر يعرض عن العدل والميل 


يترك عنه كثر اللغا واللعاني = يسلك طريق العافيه والتساهيل 


عساه من سكان خضر الجناني = يسقى ضريحه مرزمات الهماليل 


مراتع الذياب وسوح الحصاني = وتلاع فتق الظاهره والمداخيل 


الرمث في وديانها والمحاني = ينبت به الربله وحوذان وكحيل 


الشيح والقيصوم وعبيثراني = وسفح الجبل ينبت تغاما وعهيل


عريانه سفح الجبل والمثاني = بس الهبايب له صغيرا وتجويل 


مغبرة قيعانها والمتاني = بس الحصا واقف عليها مخاييل 


ماشفت فيها ذيب ولا حصاني = وسرب الحجل ماعاد يارد على الغيل 


لقيت فوقه ناعم الرمل باني = من ذاري الغربي عليها غراميل 


رجعت منها عايف كل شاني = رجعت ولا لي رغبة بالتفاصيل


الا أني اشكر ربي اللي عطاني = صبرا وسلوانا بالعمر تمهيل