ياصاحبي تبقى الثعالب ثعالب=وتبقى الذيابة لو توانت ذيابة


الديك ديك لو طلع له مخالب=والحر حرٍ لو زمانه خلا به


أنا مع الطيبين قلباً وقالب=عصابةٍ للي يدور عصابة


شرٍ على ملعون سبع المتالب=خيرا على من علقت بي ركابه


يامحمد اعرض عن شحيح المحالب=خل الزلابة مثل ماهو زلابة


زلابه دايم عيونه تزالب=وان شاف له ضولن طمل في ثيابه


طرطبةٍ وأكثر علومه طهالب=متساويٍ عندي ذهابه و إيابه


لبلاب وادوخنا بكثر اللبالب=بكثر مايمدح ب مامه وبابه


كنت احسب ان جده لؤي بن غالب=ولا احد عشرة خيار الصحابة


واليا مير جده لاش قشر ولا لب=كسرة لحيقٍ من ملاحيق لابه


في سلطة النمر أبن تولب توالب=ياما عليهم شال نمرٍ زهابه


عصلب ردى دفوه سبعة عصالب=قام يعدي و يطيح من حر ما به


فلة سلاتيحٍ رخومٍ زهالب=الشكل غيرٍ و الروابع تشابه


على جبينه مثل وسم الدغالب=باقي أثر رمحٍ جديدٍ صوابه


أرفع مقامك يا كريم المطالب=عن كل عفنٍ ما يندي ترابه


ألم تقل بالأمس أن الطحالب=ما كدرت من نبع ماءٍ شرابه


أن أبن كحلوبٍ و معه كحالب=ما أجهضوا بالنبح ماء السحابه


صفر العيون أجيوشهم لو تكالب=من خشم غافي ما تحرك ذبابه


مغلوب ولا يا أحمر العين غالب=أنا معك دايم و جابه بجابه


أمجمعة سلكين موجب و سالب=نقصف خرايبهم خرابه خرابه


ونعدل لوالبهم لوالب لوالب=ونقطع طلايبهم طلابه طلابه


أهل العشاش اللي علينا تجالب=لا من أصل يذكر ولا من مهابه


سود العلابي فارغين المعالب=ما منهم اللي فج للضيف بابه


جرد الهلابي فايهين المهالب=جلبة شريطيٍ لقاهم بغابه


لا في بني بكرٍ ولا في التغالب=ولا في بني خندف ولا في شبابه


مدري من الأصل الصقلي صقالب=أم من بقايا الزبط نهبوا نهابه


قامت للأسلاب القديمة تسالب=كل فرخ دابٍ جاك رامٍ سلابه


سحالب تسحب وراها سحالب=ما منهم اللي يدمي العظم نابه


أكثر مناقب قوم وجدي مثالب=عدو عينك من غدوا له قرابه


قامت على صبيان بدوا تآلب=قومٍ عليهم من وصخهم جنابه


يوم أن دواليب الليالي تدالب=و هم مثل جرو الثعل في خبابه


حثالبٍ لا رحم أبوها حثالب=لا صاح صياح الضحى ما تجابه


ولا أنت عودك في سماء المجد صالب=صالب و زادته الليالي صلابه