11-26-2010 05:58 PM شيبة عرعر يكشف مفاجأة من العيار الثقيل لصحيفة عرعر اليوم وهي أنه قد تعرض للضرب!!! ويكشف سر عدم حضوره لحفل توزيع جوائز جوال عرعر اليوم على الرغم من الأنباء التي ظهرت وأكدت أن شيبة عرعر سيكون من بين الحضور ويكشف عن هويته لكنه تراجع عن الحضور في اللحظات الأخيرة الممتع
عاد بعد طول غياب على قراءه والذين أفتقدوا شيبة عرعر من خلال الرسائل التي تصل لعرعر اليوم للسؤال عن الشايب المشاكس
س: عيدك مبارك وكل عام وانت بخير ياشيبة عرعر ؟
ج : وانتِ يامدينتي الغاليه والقراء الأعزاء كل عام وانتم بخير .
س : سلامات ياشيبة عرعر وش هالبقع اللي على ملابسك وهالهوز ( اللي ) بجنبك وهالمقص اللي بيدك ؟
ج : ههههههههه يامدينتي الغاليه شر البلية مايضحك تعالي واجلسي بجنبي اقولك التفاصيل .
هذا الله يسلمك البقع وانا طالع ذاك اليوم من صلاة العصر مادريت الا اللي يتساقط عليّ تقل حبات برد ناظرت للسماء لقيتها صافية تحققت من اللي اصابني وجدت انه بيض التفت على يميني الا مجموعه من المراهقين جالسين على الرصيف يتضاحكون ويتغامزون بي مريتهم وسألتهم انتم اللي ضربتوني بالبيض قالوا وهم يتضاحكون . نعم وآسفين ياشايب نحسبك مدير التعليم بالمنطقه . قلت لهم اولاً مدير التعليم مايشبهني هو شباب وانا شيبة متقاعد لي اكثر من عشرة سنين . ثانياً وش ذنب مدير التعليم تبون تضربونه بالبيض . قالوا علشان هالمقررات الجديدة اللي ماقدرنا نفهمها وكيف نفهمها والمدرسين اصلاً ماهم فاهمينها . قلت لاحول ولا قوة الا بالله ياشنين مدير التعليم ما هو اللي قرر ذلك هذيك وزارة التربية ماهي ادارة التعليم . قالوا حنا مقلدين قلت مقلدين من . قالوا نقلد الطلاب الرووس اللي ضربوا وزير التربية بالبيض علشان تردي التعليم عندهم . قلت لا حول ولا قوة الا بالله عذر اقبح من فعل وبعدين ياعرعر من المسؤول عن تصرفات هالمراهقين لا تقولين التربيه والتعليم الحقيقه ان المسؤول عن ذلك هم اولياء الامور كيف ولي امر يروح للمسجد ولا يدري وين عياله هم بالبيت او المسجد او في الخارج وما دام هذه هى تربيه اولياء الامور عندنا عليك السلام يامدينتى الغاليه .
اما الهوز ( لي الماء ) ابي افزع لثانوية البنات اللي يقولون طافحة بها مياة الصرف الصحي وليا انتهيت منها ابي افزع لاخواننا بحي الفيصليه اللي ماتهنوا بعيدهم من طفح مياة الصرف الصحي ياما تحل مشكلتهم .
اما المقص ابي اروح للقريه النائية اللي يقولون مديرة مدرستها ومساعدتها غسلن رؤوس الطالبات بالقاز والخل ابي اقص رؤوسهن واغسلها بالقاز والخل فالجزاء من جنس العمل .
س : ياشيبة عرعر اشوف معك ملف علاقي وبة مجموعه اوراق عسى ماتبي تقدم على وظيفة ؟
ج : الوظائف ما حصلت للشباب تبينهم يوظفوني وانا شايب ومتقاعد بس هذه الله يسلمك شهادة الدكتوراه لاخوي اللي اصغر مني ابي اسجله بالنادي الادبي يقولون يبون ينتخبون الاعضاء للدورة القادمة انتخاب ولازم يسجلون ( ناخبين ) قصدي مثقفين علشان ينتخبون مجلس ادارة جديد .
س : طيب اخوك مثقف ؟
ج : يا دافع البلى شهادة دكتوراه صادرة من ام درمان ما تكفي ؟! صحيح ان ثقافته ضحله مهو مثل ولد عمه اللي معه الابتدائية من مدرسه ام الضيان ( الله يرحمها ) اللي ما شاء الله عليه يعتبر بحر في كافه العلوم وله مؤلفات في الشعر والنقد والقصه ومؤرخ وبعدين المسؤولين بالنادي الادبي اذا ماحطوا ضوابط كل من يحمل شهادة جامعيه فما فوق يعتبر نفسه مثقف وباكر تشوفين يامدينتي الغاليه يصير اللي يتقدمون لناديك الادبي كثر شيوخ القبائل اللي طلعوا يوم زيارة مولاي خادم الحرمين الشريفين حفظه الله للمنطقه وامتلأت شوارعك باللوحات الشيخ فلان والشيخ فلان حتى تخيل لنا بان كل اسرة بها اكثر من شيخ وقلنا ان شاء الله ان هالشيوخ يبون يجتمعون ويقدمون للملك مشروع يفيد المنطقه وبالاخير تبين لنا بانهم يدورون شرهات فقط ولولا كرم ملكنا حفظه الله كان فزعة سهيل للجدي .
س : وانت ياشيبة عرعر عندك نيه تتقدم على الاقل لو ناخب ماهو عضو ؟
ج : انتِ يامدينتي تعرفيني زين ما اتاخر عن خدمتك في أي مجال لكن في هذا المجال اعذريني فالثقافه والادب لها اهلها ورحم الله امرءاً عرف قدر نفسه .
س : ياشيبة عرعر انت حضرت افتتاح المدينه الرياضيه ؟
ج : الف الف مبروك يامدينتي الغاليه لك ولشباب المنطقه هذه الهديه الغاليه من امير الشباب صاحب السمو الملكي الامير / سلطان بن فهد بن عبدالعزيز ال سعود . وكيف ما احضرها والافتتاح تحت رعايه سيدي امير المنطقه وان شاء الله نبارك لك بتاهل ناديك الى صفوف الانديه الممتازة وتمت فرحتنا بتسميتها باسم اميرنا المحبوب .
س : ومتى تتوقع بتاهل نادي عرعر الى صفوف الانديه الممتازة ؟
ج : هذا متوقف اولا على دعم رجال الاعمال وثانياً على جهود الادارة ومكتب رعايه الشباب بالمنطقة واذا حصل ذلك ان شاء الله يكون التاهل مع افتتاح فندقنا الجديد ذو الخمس (*****)
س : ما مدى رضاك ياشايبنا عن المواقع والصحف الالكترونيه بعرعر عامه وعن صحيفة عرعر اليوم خاصه ؟
ج : انا مؤيد لهذه المواقع والصحف بشرط ان يكون ما يكتب بها من اجلك ياعرعر وفيه من المصلحه العامه لك ولمواطنيك والسابق تطلعها يدها والحكم الاخير للمواطنين عامه والقراء خاصه .
س : بماذا تفسر امتناع بعض المسؤولين بالاجهزة الحكوميه عن التصريح لهذه الصحف بحجه انها غير مرخصه ؟
ج : والله حيروني هالمسؤولين لما يكون عندهم افتتاح مشروع ما او اقامة حفل يتسابقون على هذه الصحف للتغطيه ويكرمونهم اذا لقوا صورهم بارزة مع راعي الحفل واذا طلب منهم رد او تعليق على تقصير في عملهم قالوا مانتعامل مع الصحف الالكترونيه ألا يقتدون بالوزراء وكبار الكتاب والمسؤولين بالدوله اللي يصرحون ويكتبون للصحف الالكترونيه . فانا نصيحتي للمسؤولين عن الصحف الالكترونيه بمنطقتنا ان استمروا في عملكم مادام في خدمه منطقتكم ومواطنيكم وسياتي اليوم الذي لايجد به بعض مسؤولي الاجهزة الحكوميه مايتعذرون به وان غداً لناظرة قريب .
س : يقولون ان مسؤولي صحيفة عرعر اليوم دعوك للمشاركه في حفل توزيع جوائزها على مشتركي الجوال ورفضت ماسبب ذلك ؟
ج : خفت يركبني جني واسحب الجوائز لاولادي واحفادي وانا ما ادري وبعدين الجماعه ما قصروا اختاروا خيرة الرجال بالمنطقة لسحب الجوائز بكل حيادية ونبارك للفائزين .
س : اكيد ما بالخاطر شيء يقولون ان جايك عروض مغريه وتبي تتركهم ؟
ج : اشوفك ياحبيبتي ياعرعر شغاله عندك وكاله يقولون انا مادام صحتي وظروفي تسمح لي بالكتابه لن اكتب الا لعرعر اليوم فانا معك ياعرعر وسميتك عرعر اليوم دايم الدوم .  28
خدمات المحتوى
التعليقات #5549  [خالد الصقري] 11-26-2010 06:09 PM الله عليك يا شيبه عرعر دائما تطرح مواضيع لها صدى في ولاية عرعر
حوار جميل منه
لا تطول علينا يا شيبه باللقاء القادم
#5552 [خلف بن جويبر ] 11-26-2010 06:52 PM مبدع وصدقني ياشيبتنا الغالي أن السعادة غمرتني عندما وجدت تعليقات لأكثر من خبر ومادة أنا من كتبها أتعلم لماذا ؟ لأني أثق بشخصك ونظرتك للصحافة ومدام بعض أخباري وموادي الإعلاميه أشارت إليها فهذا دليل قاطع أن تعبي في الكتابة لم يذهب سدى وبالعكس تماما فأنا حصلت على مايقابل جوائز الدنيا كلها بتعليقات الرائعة
عموما بيض الله وجهك وأطال الله عمرك لنا في عرعر اليوم وأبي أرفع لك قبعتي أحتراما على ماكتبت شكرا لك من القلب لأنك تبقى لعرعر اليوم فقط وهذا شرف لنا ونفخر به أمام زميلاتنا الصحف الأخرى
شكرا مرة أخرى ودمت بود
#5558 [النجار] 11-27-2010 12:54 AM شيبة عرعر ممتع
روووووووووووعة فديتك
بس زعلان عليك من الحوار الماضي طلبتك تشوف حال الأحوال المدنية ولاجبتهم بالطاريء
تكفى والله فاقعين مرارتي الاحوال بطريقة تعاملهم مع الناس
#5560 [ابوفهد] 11-27-2010 12:56 AM ههههههههه
تخيل يضربون الوزير عندنا بالبيض ووووووووووا
تلقى بلاوي
حنا لو تنتقد افضحوك
تسلم ياشيبة عرعر
#5561 [ابن الصحراء] 11-27-2010 12:57 AM 
لا تطول ياشيبنا والله خفت يوم قريت العنوان انك انضربت
والله خوفتني عليك
#5563 [لاعب قديم] 11-27-2010 12:59 AM والله نادينا عرعر لو يفتحون مو مدينة رياضية لو يفتحون ( دولة رياضية ) ماراح يصعدون للمتاز
#5565 [صحفي شاطر !!!!] 11-27-2010 01:01 AM خل عنك والله انك مثقف ياشيبة عرعر والمفروض انت تترشح للنادي الأدبي
مو أخوك 
#5567 [غالي ياوطن ] 11-27-2010 01:04 AM بس قل للطلاب لايقلدون الرووس والله عندنا تلقاهم بخبر كان
اهم شيء الحمدلله على السلامة قلنا الشايب قديته صار فيه شيء 
#5575 [ابوريان] 11-27-2010 09:40 AM شيبة عرعر أصبحت شيء رئيسي بعرعر اليوم
قواك ربي وأمتعك بالصحة وأطال بعمرك
#5576 [قريب من حزم الجلاميد] 11-27-2010 09:42 AM أما مسألة القاز والخل مرت مرور الكرام مالومك ياشيبة عرعر لو بغيت تقص شعر من عمل الشيء هذا
لاحول ولاقوة الا بالله
موفق خير ياشايبنا
#5577 [خالد الرويلي] 11-27-2010 09:43 AM ( ) ( ) ( ) ( ) ( )
ماحلاك ومحلى سوالفك ياشيبة عرعر وربي أغليك
#5578 [بالفيصلية] 11-27-2010 09:45 AM مشكوووووووووووور
ربي يعافيك
أما مسألة الصرف الصحي ياشيبة عرعر الأمانة وش رايك فيها على طفح مياه الصرف الصحي هذي مصيبة كارثة
#5579 [الحماد] 11-27-2010 09:47 AM أما الشيوخ اللي يدورون شرهات جبتها على الجرح 
أعجبني طريقة الحوار
#5581 [مابنكسر صابر] 11-27-2010 01:18 PM افا شيبه وبيض
ياحلووو سوالفه تونس
اتمنى يكشف عن نفسسسسسسسسسه
مشكووورين
#5582 [عجبي] 11-27-2010 02:08 PM اموت وأعرف كيف يسمح المسئول لنفسه يعرف وضع حي الفيصلية والفضحية اللي صارت بالصرف الصحي ويسكتون
عجبي
عجبي
ثم
عجبي
#5583 [ورق] 11-27-2010 02:09 PM الصحف الألكترونية أفضل شيء وأقوى من الصحف الورقية واكثر انتشار أصلاً الآن أغلب الناس نست مسألة الصحافة الورقية
جرايد ورقية ياقدمهم
#5584 [حلا] 11-27-2010 02:10 PM جزاك الله خير خير ياشيبة عرعر أصبحت تلامس مشاكلنا بشكل كبير
ربي يخلليلك عيالك
#5591 [عبدالله الدهمشي] 11-27-2010 03:14 PM ابو تركي خلف جويبر الاهتمام بموضوع الحراسات الامنية
#5597 [اخو رفعه] 11-27-2010 08:00 PM أيييييييييييييييييييييييييييييييييييييييه ياشيبة عرعر
لياضاق صدري نحرت السوق ............... وإلا تيامنت للسده
#5601 [أديب] 11-28-2010 12:05 AM الشايب اقول مانت شايب أنت شباب وتعرف كل شيء
لكن فيه شيء لفت انتباهي بالحوار موضوع النادي الأدبي كيف نسجل بمسألة الانتخاب وكيف نصير مثقفين علشان نصوت
أجل ابغى أقرأ كتاب لاتحزن علشان اذا عملوا أسئلة للمثقفين علشان يعطونهم بطاقة للانتخاب وش آخر كتاب قرأته أقول لاتحزن تعرفون برستيج هالحين صار طكتاب لاتحزن حق عايض القرني
وربي مايخفاك شيء يالشايب الخطير آآآآآآآآآآآه منك
#5602 [حسن الفيصلية] 11-28-2010 12:07 AM مياه الصرف تعبنا منها
والله أفكر آخذ الورعان ونروح ننام بالبر نبغى ننحاش بارواحنا أنمرضنا والله انمرضنا
#5604 [هلا وألف هلا] 11-28-2010 12:38 AM مشكوووووووووووووووووووووووووور
ربي يحفظكم ياشيبة عرعر
#5605 [ابو لمى] 11-28-2010 01:29 AM صراحة موضوع شيق وفي الصميم ويلامس الواقع ولا يسعني في هذا المقام إلا أن اتقدم بالشكر الجزيل لجميع المحررين في الصحيفة وعلى رأسهم أخونا الغالي فيصل القيران وكذلك أخونا خلف جويبر على مايبذلونه ويقدمونه من جهد وعناء في إيضاح كل ماهو يهدف لخدمة الصالح العام وكذلك في خدمة منطقتنا الغالية عرعر ..
سائلاً العلي القدير أن ينفع بهم وأن يجعل ذلك في موازين حسناتهم إنه ولي ذلك والقادر عليه .
#5615 [ابومازن] 11-28-2010 11:40 AM الادارات الحكومية كل يوم عذر
الله يستر من الجاي
#5616 [حااااااااااااامد] 11-28-2010 11:41 AM هلا بشيبة عرعر رااااااااااااااااااااااااااااايق
وربي راااااااااااايق
#5624  [سلطان العنزي] 11-28-2010 11:05 PM بعد السلام والتحية للجميع
أنا بصراحة معك ضد نظام التعليم او بالأصح \"سياسة التعليم \" لعلنا جميعا استغربنا عندما قرأنا بالصحف حول خبر الطالب الروسي الذي ضرب المسؤول بالبيض ولكن من الاكثر غرابه أن تجد ان اغلب الروس مؤيدون لتلك الضربة بغض النظر عن حجم ذلك المسؤول
والحقيقة ان الدول المتقدمة تعطي التعليم الاولوية القصوى ايمانا منهم ان التعليم الناجح سبب رئيسي في تقدم ذلك البلد في جميع النواحي ، ولذلك تجد ان انظمة التعليم في غاية المرونة بمعنى انه ليس من الصعب تغير نظام او قانون او سياسة في كلية معينة في حال انه وجد بعض الملاحظات حول ذلك النظام وكذلك سوف تجد لجان طلابية يتم انتخابها سنويا لكي يصل صوت الطالب الى مدير الجامعه في كل شي يختص بالطالب وغيره من الامور اللتي تجعل الكثير مننا يحلم بان يكمل دراسته خارج هذا الوطن الشامخ وبعيدا عن الامور التعسفية في تعليمنا ... ودمتم بود
#5654 [عبدالرحمن العنزي ] 11-29-2010 12:14 PM يعطيك العافيه ياشيبة عرعر
وانت دائما مواضيعك صراااااااااااااحه روعه
ومشكوووووووووووور
ويعطيك الله الف عافيه
#21223 [راعي الهدباء] 11-22-2011 12:34 PM شيبة عرعر / انت يوسف نايف اللعاق صراحة ماعرفك بس سمعت انوو انت هذا الشخص.
| تقييم
|
شيبة عرعر يتعرض للضرب !!! ويكشف سر رفضه حضوره لحفل جوائز جوال عرعر اليوم 