05-28-2012 05:11 PM عرعر اليوم ـ التحرير :هاهو يعود من جديد والقاريء ينتظر بشوق لشيبة عرعر والذي عاد بإقتراح لمكافحة الفساد بإنشاء ميزان !!
مالذي يقصده شيبة عرعر بالميزان وماعلاقة مكافحة الفساد بالميزان ؟؟
الإجابة في ثنايا الحوار الجديد والذي كشف من خلاله شيبة عرعر عن موهبة شعرية لديه .. لانطبل عليكم فإلى شيبة عرعر ...
السلام عليكم ورحمة الله وبركاته ياشيبة عرعر
وعليكم السلام ورحمة الله وبركاته يامدينتي الغاليه عرعر
سلامات ياشايبنا الفاضل والحمد لله على سلامة حفيدك اللي سوا الحادث المروري
الله يسلمك يامدينتي الغاليه ويسلم اهالي عرعر الكرام اسال الله ان لا يريهم اي مكروه جميعاً
ياشيبة عرعر كانك زعلان على هالجمس الخرده؟
لا والله يامدينتي الغاليه انا مؤمن بقضاء الله وقدره والحمد لله الذي قدر ولطف ولكن زعلان من المعاناه التي عانيتها بالمراجعه لانهاء اوراق الحادث .
عفواً ياشيبة عرعر على المقاطعه قبل ما ندخل بتفاصيل المعاناه اطلب منك تسمعني المرثيه اللي قلتها بالجمس
لا لا اعذريني يامدينتي الغاليه .
لان القصيدة لا ترتقي الى مرتبة القصيد من حيث الوزن والقافيه هذا اولا
وثانياً لانها خاصه بيني وبين احفادي وليست للنشر
وثالثا ما اخفي عليك وعلى القراء الكرام انني بحثت عن شاعر يصلحها لي ولم اجد . وكل ما رحت لشاعر اما يقول قصيدتك مصدومه ولازم تجيب ورقة اصلاح . والا يطلب مبلغ خيالي فقلت الموضوع ما يسوى وجع الراس . فقررت عدم النشر .
ياشيبة عرعر انت تعرف ان اهلك واخوانك وابنائك من اهالي عرعر ضايقه صدورهم وبحاجه لمن يرفه عنهم ولو بقصيدة هزيله وعوجا وعلى ماقالوا المعنى ببطن الشاعر
يامدينتي الغاليه وش اسباب ضيقة صدورهم وهم يضرب بهم المثل في سعة البال؟
ياشيبة عرعر انا اعرف انك تعرف اسباب ضيقة الصدور لكن ابي اذكرك في بعض منها على سبيل المثال لا الحصر
* تعثر عدد من مشاريع المنطقه وسحب عدد منها .
* سوء تنفيذ المشاريع التي انجزت .
* كثرة البطاله .
* ارتفاع الاسعار .
* عدم الاهتمام بالشمال واهله وعدم تلبية صراخهم وزيادة على ذلك يقذفوهم بعدم الوطنيه واحيانا استبعادهم من المناسبات الوطنيه كالحوار الوطني . واخرها ما قام به معالي الوزير خوجه من استبعادهم من تمثيل المملكه بإحتفال اليونسكو .
* استمرار اللوبي الاداري .
* مجرى بحر المسك (الصرف الصحي ) داخل الاحياء وتبرير مدير الجهة المسؤول بانه ليس من اختار الموقع ولا نيه لدية لاصلاح الخطأ . ومتى ياتي مسؤول تهمه صحه الناس ؟
* عدم وجود حدائق واماكن ترفيهيه كافيه للاسر يقضون بها اوقات الفراغ مع ابنائهم .
* تغريدات الدكتور صالح السعدون .
* حتى بيوت الله اللي الواحد ينشرح صدره بمجرد دخولها صارت تضيق الصدر اما لسوء تنفيذ او لعدم النظافه
آآآآآآه منك يامدينتي الغاليه مسكتيني على الجرح وتعرفين اني ما اقدر ارفض لك طلب وابي اقولها وامري لله – لكن احذرك لو انتقدوني القراء وتهكموا عليٌ ترى انتحر وتتحملين المسؤوليه .
ياشيبة عرعر اللي تسببوا بانتحار الشباب مالقوا اللي يسالهم تبيهم يسالوني عن انتحارك وانت في ارذل العمر . بس خلصنا وسمعنا القصيده .
ابشري - ابشري ما تغلا عليك وعلى القراء . وكلمات المرثيه تقول :
هههههههههههههه ماشاء الله عليك ياشيبة عرعر والله انا من وجهة نظري بانك شاعر ما يبي لها كلام . والان حدثنا عن معاناتك في مراجعة المرور لانهاء اوراق الحادث ؟
احسن ما بك ياعرعر بانك تجامليني ....
اما المعاناه فقد بدأت في صباح يوم الحادث بعد ما تطمنا على الولد بالمستشفى رحت للمرور وجيت قسم الحوادث وقابلني واحد نفسه براس خشمه على مايقولون وسالته عن الموضوع . قال جب رقم الحادث قلت وين القاه . قال عند ضابط خفر او من الافراد اللي مستلمين معه . قلت ما اعرفهم ياوليدي ولافيني حيل ادور عليهم قال خل غيرك يجي ويدور عنك . قلت لاحول ولاقوة الا بالله واثناء خروجي من المكتب نطحني واحد يقولون له وكيل قريب .
ههههههه وكيل رقيب ياشيبة عرعر مهو وكيل قريب ؟
ماعلينا المهم رجال طيب وحياني (الله يحي شيبة عرعر) واخذني بيدي وادخلني في مكتبه ونادا على القهوجي وطلب شاي وقهوه وبعدما تقهويت قال آمرني ياعم .
قلت الله يطول عمرك الموضوع كذا وكذا قال اولا الحمد لله على سلامه الولد وابشر الان تخلص ان شاء الرحمن . عطني بطاقتك وبطاقة ورخصة السائق .
وفعلا بعد عشر دقائق جاب لي ورقتين قال الاوله تروح تستلم السيارة من الحجز والثانيه تقدير اصلاحات وقطع غيار وقال ابشرك بان نسبه الخطأ على اللي صدم السيارة 100% ومؤمن يعني ماتدفع شيء من جيبك . قلت الله يحفظك وشكرته واستودعته الله مع السلامه مع السلامه .
رحت للحجز وبعد معاناة وصلته من سوء الطريق المؤدي له ولقيت العسكري وبعد السلام عليه عطيتة ورقه استلام السيارة قال ياشيبة عرعر رح للصناعيه وادفع لصاحب الونش اللي نقل السياره وجيب ايصال منه وبعدين تستلم سيارتك . رجعت للصناعيه واتصلت على صاحب الونش ووصف لي مكان الورشه وقابلته وقلت له كم إيجارك وطلب مني مبلغ لايستهان به قلت يا اخي هذا كثير قال هذا محدد من ادارة المرور قلت طيب وش رايك تروح تجيب السياره وتعرضها على الورش المحدده لتقدير الاصلاح وكذلك محلات قطع الغيار المحدده ايضاً لوضع اسعار القطع التالفه . وبعد شد وجذب اتفقنا على سعر معين والله انه غالي بس قلت في قرارة نفسي مادام شاب سعودي حتى لو غلبني بحل . ولا ياخذها عامل وافد .
المهم الرجال اتصل بي بعد صلاة العصر وقالي ياعم خلصت المهمه وتعال استلم الاوراق وفعلا جيته واستلمت الاوراق منه وشكرته على حسن خلقه ومشيت .
وفي اليوم الثاني رحت لادارة المرور وما لقيت الا ابو نفس قشراً ويوم قرأ الاوراق قال لي مادام تقديرات قطع الغيار تجاوزت الحد الادنى المسموح به الان خذ هالاوراق ورح لمعارض السيارات المحدده بالورقه يقدرون قيمة السيارة قبل الحادث وبعد الحادث .
قلت يابن الحلال السياره ماتمشي وشلون اوديها للمعارض . قال استاجر ونش .
المهم اتصلت على صديق شرواكم واخذ الاوراق وخلصها لي من المعارض ورجعتها للمرور وعطوني الاوراق قالوا ودها لشركة التامين .
ويوم جيت شركة التامين قالوا صور السيارة بعد الحادث وجبها . صورت السياره وجبت الاوراق قالوا راجعنا بعد شهر .
وبهذه المناسبه ودي اوجه عدة اسئله لسعادة مدير ادارة المرور :
• هل هذا النظام معمول به بجميع مناطق المملكة
• لماذا الاحتكار للسطحه التي تنقل السيارات المتعرضه للحوادث او للورش ومحلات قطع الغيار والمعارض التي تقدر قيمة السيارات واللي بسبب هذا الاحتكار صار يدفع المواطن بينما كانت في السابق التقديرات مجانا
• لماذا لم تحمل شركات التامين هذه المصاريف وماذنب المواطن سيارته مصدومه ويدفع عليها فلوس على ماقال المثل الشعبي ( مضروبه ومغسل بقربتها )
• لماذا ينتظر المواطن شهر او اكثر حتى تاتيه قيمه التعويض من شركة التامين
الله يعين ياشيبة عرعر علشان كذا مسوي لك ورشة (ميزان) اكيد تبي تنافس هالوافدين بالصناعيه
يامدينتني الغاليه الوافدين مانافسوهم الشباب العاطلين عن العمل تبيني انا انافسهم
اجل وش هالمحل (ميزان شيبة عرعر ) ؟
هذا الله يسلمك مقترح مسويه لهيئه مكافحه الفساد بان ينشأون عندنا ميزان للمسؤولين عن المال العام باي جهة حكومية وفي نهايه كل شهر يجيبون هالمسؤول ويوزنونه فاذا زاد وزنه معناته لاهف له لهفه ويحولونه للتحقيق واذا نجحت الفكرة تعمم على جميع مناطق المملكة .
المشكلة ياشيبة عرعر في زيادة حساباتهم وليس اجسامهم
البعره تدل على البعير
آآآآآه منك ياشيبة عرعر ومن افكارك
والله يامدينتي الغاليه هذه فكرة امير الساخرين مشعل السديري
 19
خدمات المحتوى
التعليقات #29643  [ابوعبدالله العنزي] 05-28-2012 05:58 PM ألف سلامة عليك ياشيبة عرعر أنت والجمس يفداه جمس
مكافحة الفساد اقتراح جميل جداً ميزان
بس ياخوفي ان هالميزان عند بعض الناس يكسرونه مايتحملهم من كثر ماسرقوا
#29644 [لاعب حواري] 05-28-2012 06:30 PM أصبر ياشيبة عرعر إذا مانتشرت الأمراض وعلى مستوى كبير بمدينة عرعر بسبب الصرف الصرف الصحي اللي صار داخل عرعر
لازم يشيلونه ومن الآن على مدير المياه العمل على ذلك لأن انتشار بيوت المواطنين أصبح كبير جداً خاصة بالربوة
ياناس شوفوا حل بهالصرف الصحي
#29645 [عاااااااااااااااقل] 05-28-2012 06:34 PM * تعثر عدد من مشاريع المنطقه وسحب عدد منها .
* سوء تنفيذ المشاريع التي انجزت .
* كثرة البطاله .
* ارتفاع الاسعار .
* عدم الاهتمام بالشمال واهله وعدم تلبية صراخهم وزيادة على ذلك يقذفوهم بعدم الوطنيه واحيانا استبعادهم من المناسبات الوطنيه كالحوار الوطني . واخرها ما قام به معالي الوزير خوجه من استبعادهم من تمثيل المملكه بإحتفال اليونسكو .
* استمرار اللوبي الاداري .
* مجرى بحر المسك (الصرف الصحي ) داخل الاحياء وتبرير مدير الجهة المسؤول بانه ليس من اختار الموقع ولا نيه لدية لاصلاح الخطأ . ومتى ياتي مسؤول تهمه صحه الناس ؟
* عدم وجود حدائق واماكن ترفيهيه كافيه للاسر يقضون بها اوقات الفراغ مع ابنائهم .
* تغريدات الدكتور صالح السعدون .
* حتى بيوت الله اللي الواحد ينشرح صدره بمجرد دخولها صارت تضيق الصدر اما لسوء تنفيذ او لعدم النظافه
كل ماذكرته صحيح خاصة تغريدات الدكتور ليه مايحققون فيها أشوف مدير الجامعة ساكت عنها وين باقي جهات الدولة ماتشتغل تصريحات خطيرة من دكتور بالجامعة والعالم نايمه ولا همها الله يستر بستره
#29653 [معلم مغترب] 05-28-2012 11:47 PM شيبة عرعر أحبك في الله
وش رايك بتجديد الروساء هل مكافأة أم عناد لأهل عرعر
18 عام
18 عام
18 عام
حرام والله حرام مافيه غيره وش الميزة اللي عند الروساء ومهي موجودة عند غيره الا شيء ماندري عنه يمكن !!
#29654 [طلال الرويلي] 05-28-2012 11:54 PM وين الغيبة
عسى ماشر
والا مالقيت سيارة بعد صدمة الجمس
والله عرعر مهي كيرة حيل
لو حولنا لسياكل أحسن من السيارات ومشاكلها
#29657 [اكاديمي شمالي] 05-29-2012 12:11 AM الشمال وإهمال الشمال جعلنا منطقة نائية
نناشد خادم الحرمين بأن يلتفت للشمال عانينا عقود طويلة من الإهمال سواء إهمال مقصود أو غير مقصود
أبدي اعجابي بأسلوبك شيبة عرعر
#29658 [الصقرررررري] 05-29-2012 12:16 AM والله قصتك مع المرور تصلح مسلسل
هذي القصة كلنا عانينا منها
خلها على ربك
أنظمة عندنا تجيب الضغط
#29659 [أبوسالم] 05-29-2012 12:30 AM وووووووووووه
صاير شاعر
شيبة عرعر
أجل يمكن الإشاعة صحيحة يمكن عرفتك
#29661 [موظف شريف] 05-29-2012 01:16 AM * استمرار اللوبي الاداري .
أبشرك اللوبي الخماسي على وشك الأنهيار بسقوط الرأس سيسقط باقي الجسد
وساعتها اللي مايشتري يتفرج
على وشك بس أنتظروا قليل
#29687 [ولد الفلنطي] 05-29-2012 03:50 PM يأهلا بجدي
وش بتسوي ياجدي هذا هم
أنا غسلت يدي يوم دريت ان الهواتف معطلة
كيف دآئرة حكومية جديدة الهواتف خربانة ومعطلة
يعني هم اصبحوا بنظر الجميع صم عمي بكم
#29689 [الناشونالي] 05-29-2012 03:55 PM الحمدلله على سلامة الحفيد
بالحديد ولا بالعبيد
ياشيبتنا الموقر في احد الأصدقاء عمل حأدث والحادث على اللي صدمه 100%
جات الشركة نجم وخططت الحادث يقولوا الخطأ على صديقي 40% وعلى ذاك 60%
لكنه رفض وطلب تخطيط المرور وجاء عسكري وخططه طلع الخطأ على اللي صادم 100%
يعني هالشركة بعرف وش تخصصها........
#29694 [زمان الصمت] 05-29-2012 07:32 PM شيبة عرعر
دائم مبدع
شف حقين الجامعة نسمع انهم اخذوا 200 ريال علشان حفل تخرج طالبات
اسأل ياشيبة عرعر مايخفى عليك شيء تلقى الجواب
#29720 [حفيد الشيبان] 05-30-2012 03:45 AM صباحكم خير
الحمدلله على سلامة الحفيد
شركات التأمين تلعب لعب بهالعالم
اصلح السيارة على حسابي وانا مؤمن
والتأمين يرسلون المبلغ بعد شهر او شهرين
-------------------------------
الحين مثلا صدمت والسيارة باسم واحد ومعي تفويض اسوقها
نظاما عند شركات التأمين التفويض يقبل لكن عند المرور يقولوا مايقبل
بعرف ليش طيب الشركة اللي تبي تدفع موافقه انتم وش دخلكم
ولا نقول الحكومة ابخص
-----------------------------
ياشيبتنا لو نبي ننبش ورى هالكبارية
وربي نسوي ارشيف فضايح...
---------------------------
#29721 [ريفالدو القحطاني] 05-30-2012 03:51 AM ياشيبة عرعر
عرعر مدينتنا العزيزة يضرب فيها
دولة داخل دولة القوانين تختلف عن جميع المناطق
الممنوع هنا مسموح بسكاكا اقرب مثال....
#29738 [LoLo] 05-30-2012 10:25 AM صباحكم خير
مكافحة الفساد لا اعرف ماهي اهميتها
لأنني ارى انها على الموظف الصغير قبل الكبير
تبادل مصالح
#29740 [بناخي هتلر] 05-30-2012 10:44 AM وينهم مكافحة الفساد عن عرعر
60% فساد إداري
30% فساد مشاريع
10%فساد تجاري
#29741 [فايز] 05-30-2012 10:49 AM والله ياشيبة عرعر ودي اشتري جمس ابو عبر
نص الشعب ماعنده ثقافة السواقة
اهم شيء يدق سلف ويمشي
الطريق له ولا لا ياخذه ياخذه
الدوار الأولوية لمن بداخله ويجمشهااااااا
ماقول إلا الله يعين العاشقين
#29742 [مناحي] 05-30-2012 10:52 AM * تعثر عدد من مشاريع المنطقه وسحب عدد منها .
* سوء تنفيذ المشاريع التي انجزت .
* كثرة البطاله .
* ارتفاع الاسعار .
* عدم الاهتمام بالشمال واهله وعدم تلبية صراخهم وزيادة على ذلك يقذفوهم بعدم الوطنيه واحيانا استبعادهم من المناسبات الوطنيه كالحوار الوطني . واخرها ما قام به معالي الوزير خوجه من استبعادهم من تمثيل المملكه بإحتفال اليونسكو .
* استمرار اللوبي الاداري .
* مجرى بحر المسك (الصرف الصحي ) داخل الاحياء وتبرير مدير الجهة المسؤول بانه ليس من اختار الموقع ولا نيه لدية لاصلاح الخطأ . ومتى ياتي مسؤول تهمه صحه الناس ؟
* عدم وجود حدائق واماكن ترفيهيه كافيه للاسر يقضون بها اوقات الفراغ مع ابنائهم .
* تغريدات الدكتور صالح السعدون .
* حتى بيوت الله اللي الواحد ينشرح صدره بمجرد دخولها صارت تضيق الصدر اما لسوء تنفيذ او لعدم النظافه
وماتبون صدورنا تضيق
#29743 [أم اليتيم] 05-30-2012 10:53 AM صرت ام ليتيم والسبب تهور شاب بالتفحيط
فقدت 3 زوجي وبنتي وولدي الصغير
مابقى لي غير الله ثم هالليد
والشرطة والمرور حدث ولا حرج
| تقييم
|
شيبة عرعر يقترح على مكافحة الفساد إنشاء ميزان لهم ؟؟ 
